wrapper

Tiranë, 07.06.2018

Etnografi arbëresh Antonio Bellusci, i lindur më 1934, në fshatin Frashinë të rrethit të Kozencës, është ndër të paktët studiues që, nëpërmjet veprës së tij, ka synuar t’u japë zë dhe prani në Evropë arbëreshëve të Italisë dhe arvanitasve të Greqisë. I lidhur ngushtë me kulturën popullore arbëreshe, si një atdhetar i rrallë, ai ia ka kushtuar një pjesë të mirë të jetës dhe krijimtarisë së tij kërkimeve etnologjike dhe antropologjike në mesin e shumë komuniteteve arbëreshe.

Me ftesë të Institutit Shqiptar të Mendimit dhe të Qytetërimit Islam, prof.dr. Antonio Bellusci ishte i pranishëm në takimin me temë: “Studime etnografike për popullatat arbëreshe”, i organizuar nga Libroteka AIITC, në kuadër të ciklit “Bisedë me autorin”.

Dhjetëra studentë morën pjesë në këtë ligjëratë mjaft interesante, ku autori prezantoi disa nga veprat e tij, kushtuar arbëreshëve të Italisë dhe Greqisë.

Bisedën e çeli nëndrejtori i AIITC Alban Kodra i cili theksoi se arbëreshët janë pakica etno-gjuhësore shqiptare, të vendosur historikisht në jug të Italisë, që prej shekullit XV. Janë emërtuar arbëreshë, pasi në kohën kur u larguan nga Shqipëria, ajo quhej Arbëria. Në Itali sot numërohen mbi 260.000 njerëz që flasin gjuhën arbërore dhe nuk e kanë harruar vendin e të parëve, duke ruajtur të gjalla zakonet e tyre.

Prof. dr. Bellusci theksoi se gjatë shekujve arbëreshët kanë arritur të ruajnë dhe zhvillojnë identitetin e tyre, duke ruajtur ritet e një bote të lashtë, duke ruajtur identitetin e tyre dhe gjuhën e pastër arbërore. Të gjitha këto ai i ka trajtuar me shumë dashuri në veprat e tij, duke lënë pas një pasuri shumë të çmuar për kombin dhe popullin shqiptar.

Ai përmendi se arbëreshët në Itali janë të vendosur në pesë krahina, në zona të thyera dhe jo të lehta për t’u jetuar. Pasi bëri një historik të shkurtër të vuajtjeve dhe mundimeve që arbëreshët kanë kaluar për ruajtjen e gjuhës dhe identitetit të tyre, në luftë të vazhdueshme me botën latine, ai foli edhe për punën e tij të palodhur për mbledhjen e fakteve të gjalla historike si etnograf, duke intervistuar dhjetëra arbëreshë të cilët kanë sjellë eksperiencën e tyre jetësore në librat e tij studimorë.

Një ndër këshillat e vyera prej tij për studentët, ishte se ata duhet të jenë krenarë që janë myslimanë, pasi ruajtja e besimit personal është e vetmja rrugë për të qenë të lumtur. Sipas tij besimi është një fuqi e madhe shpirtërore që i vjen njeriut. Në një botë ku globalizmi po përdhos vlerat e vërteta të njeriut, theksoi ai, duhet ta pranojmë pa frikë besimin tonë në Zot, pasi kjo na jep paqe shpirtërore dhe lumturi. Ai i ftoi të rinjtë që të vizitojnë bibliotekën e tij në Frasnita Frascineto (Cosenza).

Kryetari i bordit drejtues të AIITC, dr. Faruk Borova, pasi falënderoi prof. Antonio Belluscin për praninë në këtë takim me studentët, vlerësoi figurën e tij si një studiues i nivelit të lartë, me gjak shqiptar. Si studiues, filozof dhe atdhetar i rrallë, prof. dr. Antonio Bellusci është nderuar denjësisht jo vetëm nga komuniteti arbëresh, por edhe nga shteti shqiptar, madje në janar të vitit 1994 ka marrë nënshtetësinë shqiptare.

Rreth nesh

Instituti Shqiptar i Mendimit dhe i Qytetërimit Islam (AIITC) është themeluar në vitin 1996, me vendim të Gjykatës së Tiranës nr. 143, datë 04. 03. 1996. Veprimtaria e këtij Instituti është e shumëfishtë dhe e larmishme në fusha të ndryshme si: shkencore, kulturore, studimore, botuese, informuese dhe dokumentuese. 

Lexo për më tepër

Lidhjet

radio

tv kontakt 2