wrapper

Super User

Super User

Libri dhe misioni i tij në edukimin e brezave me kulturë e dije - Bisedë me autorin Xhevair Lleshi –

Tiranë, 14.02.2019

Libroteka e Institutit Shqiptar të Mendimit dhe të Qytetërimit Islam, në kuadër të ciklit “Bisedë me autorin”, zhvilloi një takim me shkrimtarin Xhevair Lleshi, autor dhe botues i dhjetëra librave artistikë, historikë e studimorë, tekste shkollore, pjesë teatrore, përkthime etj. Të pranishëm në këtë bisedë ishin studentë e studente, pjesë të programeve mbështetëse që AIITC zhvillon për këtë grupmoshë.

Takimin e çeli nëndrejtori i AIITC, z. Alban Kodra, i cili bëri një prezantim të shkurtër të personalitetit të shkrimtarit Xhevair Lleshi, duke vënë në pah dhuntinë e tij krijuese si romancier, por edhe profesionalizmin në fushën studimore e pedagogjike. Ndërsa autori Lleshi e nisi rrëfimin me ngjarje mjaft mbresëlënëse nga fëmijëria e hershme, duke përçuar te studentët mesazhin, se etja dhe dëshira për të lexuar dhe për të zgjeruar dijet ngjizet që në familje e më pas në shkollë.

Ai i mëshoi faktit se të rinjtë duhet të zgjedhin vetë atë që duan të lexojnë dhe jo të joshen nga botime pa vlerë që i përkasin letërsisë së konsumit. Por në një treg kaotik, ku ofrohen mijëra tituj librash, të rinjtë ndihen të çorientuar, ndaj ai këshillon që ta nisin leximin me klasikët e mëdhenj botërorë që kanë bërë historinë. Sipas tij, pa njohur Tolstoin, Floberin, Pushkinin, Markezin, Çehovin, Pirandelon etj., nuk mund të njohësh letërsinë moderne bashkëkohore.

Por edhe mënyra se si i qasesh një vepre letrare, sipas shkrimtarit Lleshi, është një art më vete, sepse mund ta lexosh një vepër pa u thelluar në të, pa ndier emocionet dhe pa kuptuar mesazhin që ajo përcjell. Ndaj studentët nuk duhet të bien në këtë nivel, por ta shijojnë eksperiencën e të lexuarit, duke përfituar shumë prej saj. Vetëm kështu do të shtohet etja e tyre për dije dhe për letërsi të mirëfilltë.

Një prej sugjerimeve të tij ishte edhe që të rinjtë të frekentojnë sa më shumë teatrin, kinemanë apo operan, pasi aty mund të gjejnë frymëzimin e duhur për të zgjeruar më tej diapazonin e tyre kulturor. Xhevair Lleshi vazhdon të jetë mjaft aktiv në fushën e botimeve. Me përkushtim drejton prej vitesh Shtëpinë Botuese “UEGEN”, duke sfiduar vështirësitë e tregut të librit, përmes botimeve mjaft cilësore. Aktualisht ka ndër duar një vepër me 12 vëllime të “Historisë së Letërsisë Botërore” që pritet të botohet së shpejti. Veprat e tij kanë një ndikim të madh në edukimin e brezave të rinj, sepse ato përçojnë vlera, kulturë dhe dije.

Read more

Redaksia e revistës “Univers” vizitë kortezie në rektoratin e UET

Tiranë, 22.01.2019

Në kuadër të promovimit të revistës shkencore-kulturore “Univers”, stafi i saj i kushton një vëmendje të veçantë vizitave që anëtarë të redaksisë zhvillojnë në institucionet akademike e arsimore, brenda dhe jashtë vendit. Në këtë kontekst, një përfaqësi e revistës, e përbërë nga drejtori i AIITC, dr. Ardian Muhaj, Kryeredaktori, Prof. As. Dr. Ramiz Zekaj, anëtari i redaksisë, Prof. Dr. Seit Mansaku, si dhe koordinatorja, znj. Anisa Hykaj, zhvilluan një vizitë në Universitetin Europian të Tiranës UET.

Fillimisht, ata i uruan suksese rektores së sapo emëruar të UET, njëherazi edhe anëtare e redaksisë së revistës “Univers”, Prof. Dr. Nevila Nika, duke shprehur kënaqësinë për këtë zhvillim të rëndësishëm në karrirën e saj akademike. Më pas biseda u përqendrua në shtrirjen e bashkëpunimit për realizimin e projekteve me interes reciprok, veçanërisht në promovimin e studiuesve të rinj.

Në pozicionin e një prej bashkëpunëtoreve të ngushta në redaksinë e “Universit”, ajo vlerësoi profesionalizmin dhe kontributin e kësaj reviste në fushën e shkencës dhe kulturës shqiptare. Në fund të vizitës, redaksia i bëri rektores Nika një dhuratë simbolike, në shenjë urimi për këtë arritje, duke i uruar suksese të mëtejshme.

Read more

Qendrat social-kulturore në shërbim të edukimit të brezave

Rreth 100 fëmijë të moshave shkollore vazhdojnë kurset e gjuhëve të huaja pranë Qendrave social-kulturore, nën kujdesin e Institutit Shqiptar të Mendimit dhe të Qytetërimit Islam. Duke pasur si qëllim investimin afatgjatë në edukimin e brezit të ri, Instituti AIITC ka bërë të mundur që pranë këtyre qendrave të ofrohen një sërë shërbimesh për komunitetin.

Pranë QSK Baldushk në kursin e anglishtes numërohen 45 fëmijë, në QSK Ishëm rreth 20 fëmijë dhe në Rrogozhinë mbi 15 fëmijë. Po kështu është drejt përfundimit kursi i gjuhës italiane në QSK Gërmenj. Metodat e përdorura i nënshtrohen programeve bashkëkohore të mësimdhënies, me mësues profesionistë të cilët i kushtojnë rëndësi të veçantë interaktivitetit mes kursantëve dhe gërshetimit të teorisë me praktikën. Kjo bën të mundur që fëmijët ta përvetësojnë më lehtë gjuhën e huaj.

Një tjetër kontribut është ai i formimit profesional të grave, duke i konsideruar ato si pjesë e pandarë e shoqërisë. Në fshatin Malbardhë ndjekin kursin e rrobaqepësisë dy grupe me nga 10 gra e vajza të cilat kanë shprehur interesin e tyre për t’u përmirësuar në këtë zanat. Edhe në QSK Çetë janë regjistruar në kursin e rrobaqepësisë 10 gra e vajza, gjë që do t’u shërbejë në të ardhmen për familjet e tyre, madje duke u bërë edhe burim të ardhurash.

Këto Qendra social-kulturore do të vazhdojnë punën me intensitet, duke synuar zgjerimin e mëtejshëm të këtyre kurseve si dhe organizimin e aktiviteteve argëtuese, veprimtarive kulturore apo ekskursioneve për fëmijët, ku ata mund të njihen edhe me historinë, kulturën dhe traditat e popullit shqiptar.

Read more

Rreth nesh

Instituti Shqiptar i Mendimit dhe i Qytetërimit Islam (AIITC) është themeluar në vitin 1996, me vendim të Gjykatës së Tiranës nr. 143, datë 04. 03. 1996. Veprimtaria e këtij Instituti është e shumëfishtë dhe e larmishme në fusha të ndryshme si: shkencore, kulturore, studimore, botuese, informuese dhe dokumentuese. 

Lexo për më tepër

Lidhjet

radio

tv kontakt 2